Antzinakoak dira Mallabia eta bere auzoetan heriotza-errituei erreferentzia egiten dieten aztarnak, euskal gizarteak historikoki heriotzarekin duen loturaren adibide. Herrian kontserbatzen den hileta-ondareak Historiaurretik hasi eta gaur egunera arteko bidaia egitea ahalbidetzen dute.

Euskal Herriko herri eta auzoetan egun kontserbatzen den hileta-ondarea ez da batere mugatua. Landa-guneetako egunerokotasuna antolatzen zuten kode sozialekin batera, ezin dugu ahaztu heriotza ere antolatutako gertaera zela. Historia eta istorioak nahasten diren honetan denboran bidaiatuko dugu, antzinako Mallabiko bizimodu eta ohitura erlijiosoak ezagutuz; bereziki, heriotzarekin lotura dutenak. Andabide bat izango balitz bezala, Euskal Herrian heriotzaren inguruko tradizioen garapen eta eboluzioa aztertuko dugu.

Oizko estazio megalitikoa, Zengoitiko San Joan, Andra Mari Jasokundearen Eliza eta egungo hilerria ikertuz, heriotzaren sinesmenez eta ohiturez osatutako segida historikoa osatuko dugu.

Oharrak: Mallabian autobusa hartuko dugu ibilbidea egiteko.