Haranaren hondoan, ibaitik eta Durangoko Merindade zaharra zeharkatzen duen bidetik gertu, beste garai batzuen lekuko, Muntsaratz dorrea dago, Abadiño osoko elementu arkitektoniko aipagarrienetako bat.
Dorre hau elizate honen, merindadearen eta, batez ere, bertako biztanleen historiaren lekuko aldaezina da. Mendeek, hormetan, espazio horiek ulertzeko modu desberdinak utzi dizkigute, baita zein funtziotarako eraikiak ziren ere; beraz, dorre honen barruan, gaur egunera arte iritsi diren elementu arkitektoniko horien biztanleek eta eraikitzaileek zer pentsatzen zuten ulertu ahal izango dugu, inon baino hobeto.
