HITZALDIA JON MENTXAKATORRE-ren eskutik

Giza Zientzietan graduatua da, eta Filosofian eta Euskal Filologian doktorea. Mondragon Unibertsitateko irakaslea eta UEUko Filosofia sailburua da. Herri-ondarea, irudimena eta gizabidea ditu aztergai eta irakasgai.

Ondarea arriskuan nabari denean, aldez aurretik haren iturria den gizatasun eredua kolokan dago. Ondarearen zaintzan, hortaz, balioen iturrietara ere jo behar da: sustraiko pertsona eta herri eredua egiten duen bizipenera. Gurean, Euskal Herrian, etnologia dugu horretarako bide lagungarri.

On Joxe Migel Barandiaranek arreta berezia jarri zuen euskal kultura espiritual eta gizabidearen ezagutza, jasoketa eta transmisioan. Berbaldi honetan, horren garrantziaz arituko gara lehenbizi, tradiziozko euskal nortasunaz aritzeko gero. Ostean, balioen arloan izandako aldaketa nagusien zergatia aztertuko dugu, eta gaur eta geroko balioespenerako gakoak eman ondoren.

Horrekin guztiarekin, aurrekoengandik heldu zaigun ondarea jagoteko kontuan izan beharko genituzkeen izan eta egitasmoak azalduko ditugu.