Etxaburu dorretxea Bizkaiko ezagunenetakoa da, duen kokapen berezi eta irudi ikusgarriagatik zein bere jatorriaz kontatzen diren legenda fantastikoengatik.
Mañaria errekaren parean doan ibar estu baten hondoan babestuta, harkaitz garai baten gainean altxatzen da.
Haitzaren altuerak dorretxearen berarenarekin batera Etxaburu talaia bikain bilakatzen du, inguru guztia menperatzen duelarik, Durangotik Mesetara Urkiolan zehar igotzen zuen galtzada zaharra barne.
Juan Manuel Gonzalez Cembellin historialariak gidatuko du bisita hau, eta Euskal herriko historian bete duen lekua azalduko digu, menderik mende gaur egunera arte.